მონაწილეობა საქართველოს ნეონატოლოგთა ასოციაციის სასწავლო კურსში

28 მარტს ჩვენმა ასოციაციამ მონაწილეობა მიიღო საქართველოს ნეონატოლოგთა ასოციაციის სასწავლო კურსში, რომელზეც წარმოადგინა სპინალური კუნთოვანი ატროფიის (სკა) მკურნალობის თანამედროვე მეთოდები.

სპინალური კუნთოვან ატროფია (სკა) წარმოადგენს იშვიათ, გენეტიკურ, პროგრესირებად ნერვკუნთოვან დაავადებას, მისი სიხშირეა  1/6000-9000 ცოცხალ დაბადებულში.

დაავადებას აქვს რამოდენიმე ფორმა, მათ შორის პირველი, რომელიც ნეონატალურ ასაკში იწყება და ფატალური გამოსავლით ხასიათდება, კერძოდ ყველა პაციენტი იღუპება 18-24 თვეზე, ან გადადის ფილტვების ხელოვნურ ვენტილაციაზე და საჭიროებს პალიატიურ მოვლას წლების მანძილზე. სკა ჩვილ ბავშვთა სიკვდილობის უხშირეს გენეტიკურ მიზეზს წარმოადგენს.

მეორე ფორმა პაციენტს ადრეული ასაკიდან ეტლზე მიჯაჭვულს ხდის და ასევე რესპირატორული პრობლემებით რთულდება. ამ ბავშვების გონებრივი განვითარება ასაკის შესაბამისია.

2016 წლამდე არ არსებობდა ამ დაავადების მედიკამენტური მკურნალობის შესაძლებლობა, თუმცა ამჟამად მსოფლიო ბაზარზე უკვე 3 მედიკამენტია, რომელიც სპინალური კუნთოვანი ატროფიის სამკურნალოდ წარმატებით გამოიყენება. მათ შორის ერთი – ევრისდი საქართველოშიც დარეგისტრირდა 2020 წლის აგვისტოში.