აუტიზმის შესახებ ინფორმაციის გავრცელების მსოფლიო დღე

2011 წლის 2 აპრილს საქართველოს ბავშვთა ნევროლოგთა და ნეიროქირურგთა ასოციაცია საქართველოს აუტიზმის საზოგადოებასთან ერთად შეუერთდა დანარჩენ მსოფლიოს და საქართველოში პირველად აღნიშნა აუტიზმის შესახებ ინფორმაციის გავრცელების მსოფლიო დღე.

მეტროს სადგურებთან „რუსთაველი“ და „მარჯანიშვილი“, ჰიპერმარკეტი „გუდვილი“ და კ/თ ”რუსთაველი” ამ დღის აღმნიშვნელი სიმბოლოებით მოხატულ მაისურებში ჩაცმული უმაღლესი სამედიცინო სკოლა „აიეტის“ IV კურსის სტუდენტებმა დაარიგეს ბუშტები და პროკლამაციები აუტიზმის შესახებ.

საქართველოს პარლამენტის ეროვნულ ბიბლიოთეკაში ჩატარდა აუტიზმზე ინფორმაციის გავრცელების მსოფლიო დღის მთავარი ღონისძიება, სადაც მოხდა საქართველოს აუტიზმის საზოგადოების ვებ-გვერდის პრეზენტაცია და აუტიზმის მართვის სტრატეგიული გეგმის წარდგენა. ასევე ბიბლიოთეკის საგამოფენო დარბაზში მოეწყო აუტიზმის მქონე ბავშვების და მოზარდების ნამუშევრების გამოფენა. ღონისძიებას ესწრებოდნენ შრომის, ჯანმრთელობის და სოციალური დაცვის მინისტრი ბატონი ანდრია ურუშაძე, საქართველოს პარლამენტის ჯანდაცვის კომიტეტის თავმჯდომარე ბატონი ოთარ თოიძე და საზოგადოების სხვადასხვა სფეროს წარმომადგენლები: საქართველოში აკრედიტირებული საელჩოების, უნარშეზღუდულობის პრობლემებზე მომუშავე არასამთავრობო ორგანიზაციების, ჯანდაცვის მომსახურების განმახორციელებელი ორგანიზაციების წარმომადგენლები, ბიზნესმენები, ექიმები, დაინტერესებული ადამიანები. დღის აღნიშვნა ჩატარდა ღია საზოგადოება საქართველოს გრანტის Med/08/10-176/4 ფარგლებში.