IV კავკასიური საზაფხულო სკოლა კლინიკურ ეპილეფტოლოგიაში
IV კავკასიური საზაფხულო სკოლა კლინიკურ ეპილეფტოლოგიაში შედგა ამა წლის , 2-8 სექტემბერს, საქართველოში, ლოპოტას კომპლექსში.
სკოლა ორგანიზებული იყო საქართველოსეპილეფსიასთან მებრძოლი ლიგის, საერთაშორისო ეპილეფსიასთან მებრძოლი ლიგის, ბავშვთა ნევროლოგთა და ნეიროქირურგთა ასოციაციის, ნევროლოგიისა და ნეიროფსიქოლოგიის ინსტიტუტის საერთო ძალისხმევით. აღნიშნული ღონისძიება უკვე ტრადიციად იქცა და მეოთხედ ჩატარდა. პირველი 2008 წელს სასომხეთში ჩატარდა, მეორე 2009 წელს საქართველოში, მესამე 2011 წელს აზერბაჯანში და მეოთხე კვლავ საქართველოში. საზაფხულო სკოლის მიზანია კავკასიის რეგიონის ექინ ნევროლოგთა და ბავშვთა ნევროლოგთა წვრთნა ეპილეფსიის საკითხებში. ამჯამად სკოლაში მონაწილეობდა 48 მონაწილე, მათ შორის 10 სასომხეთიდან, 8 აზერბაჯანიდან და 30 საქართველოდან.
სკოლას უძღვებოდნენ ეპილეფსიის დარგის უმაღლესი რანგის ექსპერტები სხვადასხვა ქვეყნებიდან, კერძოდ 9 ევროპელი და 4 კავკასიის რეგიონის ტუტორი. მათ შორის დიდი ბრიტანეთიდან პროფ.ჰელენ კროსი, ისრაელიდან პროფ. მეირ ბიალერი, იტალიიდან პროფესორები ემილიო პერუკა, ტიციანა გრანატა და ლუჩია ფუსკო, შვედეთიდან ტორჯონ ტომსონი, ჰოლანდიიდან ვან დე ბოასი,რუსეთიდან პროფ. ალა გეხტი, გერმანიიდან პროფ. ულრიხ შტეფანი. ლოკალური ტუტორები ნუნე ეგიზარიანი, სოფიო კასრაძე, ნათია ოკუჯავა და ნანა ტატიშვილი.
სკოლა გრძელდებოდა 5 სრულ სამუშაო დღეს, იყო ინტერაქტიული- ყოველდღიური ლექციები იცვლებოდა ტუტორიალებით და რთული პაციენტების გარჩევით. ექიმებს საშუალება ჰქონდათ მთელი დღის განმავლობაში ეწარმოებინათ დისკუსიები საინტერესო საკითხებზე.
მონაწილეებისთვის კურსი იყო თითქმის უფასო-თანადაფინანსება შეადგენდა 200 ლარს თითოეული მონაწილისთვის.
კურსის განხორციელება შესაძლებელი გახდა ეპილეფსიასთან მებრძოლი საერთაშორისო ლიგის ევროპულ საქმეთა კომიტეტის დაფინანსებით. თანადამფინანსებლები იყვნენ ფონდი „ღია საზოგადოება საქართველო“, ჩვენი ასოციაცია, ნევროლოგიისა და ნეიროფსიქოლოგიის ინსტიტუტი. ფინანსური დახმარება გასწიეს ფარმაკოლოგიურმა კომპანიებმა (სანოფი-ავენტისი, აბდი-იბრაჰიმი, ფაიზერი, ჰოფმან ლა როში, გლაქსო სმიტ კლაინი, ტევა, ჯი პი სი,) რისთვისაც მათ დიდ მადლობას ვუხდით.
იმედი გვაქვს, რომ ეს შესანიშნავი ტრადიცია, რომელიც ხელს უწყობს არა მარტო სამედიცინო ცოდნის გაღრმავებას, არამედ რეგიონული ურთიერთობების დამყარება/გაუმჯობესებას, კვლავ გაგრძელდება.
